Regína sacratíssimi Rosárii, ora pro nobis!

In Veneratióne
Immaculáti Cordis Beatæ Maríæ Vírginis, Refúgium Pecatórum

[English Text]

Introitus Ps. lxxxv: 15, 16

Tu, Dómine Deus, miserátor et miséricors; patiens, et multæ misericordiæ, et verax: réspice in nos, et miserére nostri, et salvos fac filios ancíllæ tuæ, genitrícis Fílii tui et regínæ totíus mundi. [Ps. ibid. 1] Inclína, Dómine, aurem tuam et exáudi me, quóniam inops et pauper sum ego. Glória Patri. Tu, Dómine.

Oratio:

Clementíssime Deus, qui ad peccatórum salútem et miserórum salútem perfúgium beátam Vírginem Maríam, Unigéniti tui genitrícem ejúsque gratiárum adminístram esse voluísti: præsta quǽsumus; ut, dum Cordis ejúsdem amantíssimæ Matris commemoratiónem celebrámus, et peccatoribus conversionem, et cunctis fidélibus cœléstium ubertátem donórum obtinére mereámur. Per eúmdem Dóminum.

Ecclus xxxvi: 1, 13-19

Léctio libri Sapiéntiæ:
Miserére nostri, Deus, ómnium, et réspice nos et osténde nobis lucem miseratiónum tuárum. Cóngrega omnes tribus Jacob, ut cognóscant quia non est deus nisi tu, et enárrent magnália tua, et hæreditábis eos sicut ab inítio. Miserére plebi tuæ, super quam invocátum est nomen tuum, et Israël quem coæquasti primogenito tuo. Miserére civitáti sanctificatiónis tuæ, Jerúsalem, civitáti requiéi tuæ. Reple Sion inenarrabílibus verbis tuis, et glória tua pópulum tuum. Da testimónium his qui ab initio creatúræ tuæ sunt, et súscita prædicatiónes quas locúti sunt in nómine tuo prophétæ prióres. Da mercédem sustinéntibus te, ut prophétæ tui fidéles inveniántur: et exáudi oratiónes servórum tuórum, secúndum benedictiónem Aaron de pópulo tuo: et dirige nos in viam justitiæ.

Graduale

Recordáre, Virgo Mater, in conspéctu Dei, ut loquáris pro nobis bona, et ut avértat indignatiónem suam a nobis. Memoráre diérum humilitátis tuæ, et tu ínvoca Dóminum, et lóquere regi pro nobis, et líbera nos de morte.

Allelúja, allelúja. [Esther vii: 3, 4] Si inveni grátiam in óculis tuis, dona mihi pópulum meam, pro quo óbsecro: Tráditi sunt enim ut conterántur et péreant. Allelúja.

Post Septuagesima:
Tractus: Prov. viii: 32-35

Nunc ergo, fílii, audíte me: Beáti, qui custódiunt vias meas. Audíte disciplínam, et estóte sapiéntes, et nolíte abjícere eam. v. Beátus homo, qui audit me, et qui vígilat ad fores meas quotídie, et obsérvat ad postes óstii mei. v. Qui me invénerit, invéniet vitam, et háuriet salútem a Dómino.

Tempore autem Paschali: Allelúja

Allelúja, allelúja. [Esther vii: 3, 4] Si inveni grátiam in óculis tuis, dona mihi pópulum meam, pro quo óbsecro: Tráditi sunt enim ut conterántur et péreant. Allelúja. [Ibid. 2] Quid vis fieri? etiam si dimidiam partem regni mei petieris, impetrabis. Allelúja.

Joann. ii: 1-11

Sequéntia sancti Evangélii secúndum Joánnem.

In illo témpore: Núptiæ factæ sunt in Cana Galilǽæ: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: «Vinum non habent.» Et dicit ei Jesus: «Quid mihi et tibi est, múlier? nondum venit hora mea.» Dicit mater ejus minístris: «Quodcúmque díxerit vobis, fácite.» Erant autem ibi lapídeæ hýdriae sex pósitæ secúndum purificatiónem Judæórum, capiéntes síngulae metrétas binas vel ternas. Dicit eis Jesus: «Impléte hýdrias aqua.» Et implevérunt eas usque ad summum. Et dicit eis Jesus: «Hauríte nunc, et ferte architriclíno.» Et tulerunt. Ut autem gustávit architriclínus aquam vinum factam, et non sciébat unde esset, ministri autem sciébant, qui háuserant aquam: vocat sponsum architriclínus, et dicit ei: «Omnis homo primum bonum vinum ponit: et cum inebriáti fúerint, tunc id quod detérius est. Tu autem servásti bonum vinum usque adhuc.» Hoc fecit inítium signórum Jesus in Cana Galilǽæ et manifestávit glóriam suam, et credidérunt in eum discípuli ejus.

Credo.

Offertorium

Ne áuferas, Dómine, misericórdiam tuam a nobis, propter Matrem tuam; sed fiat sacrifícium nostrum in conspéctu tuo hódie, ut pláceat tibi: quóniam non est confúsio confidéntibus in te.

Secreta:

Redémptor Dómine, cujus mortem in hoc sacrifício commemorámus: per hujus méritum et piísimæ Matris tuæ Maríæ suffrágium , omnes qui in te peccavérunt benígnus intuére: ut convérsi ab erróre viæ suæ, tibi pœneténtes desérviant, et ab ætérna damnatióne liberéntur: Qui vivas.

Præfátio de B. María Vírg. Et te in veneratióne

Communio:

Regina mundi piíssima, María Virgo perpétua, intercéde pro nostra pace et salúte, quæ genuísti Christum Dóminum, Salvatórem ómnium. (T.P. Allelúja).

Postcommunio:

Deus, qui nobis in hac mensa singuláre nostræ mortalitátis reliquísti præsídium: recordáre, quǽsumus, miseratiónem tuárum; et deprecatiónem quam toto corde beáta María, Mater tua, coram te júgiter pro clemens admítte, et eos in viam justítiæ et pacis redúcere dignéris: Qui vivas et regnas.


From Sylvester P. Juergens, SM, STD, The Ideal Missal
Turnhout, Belgium: Henri Proust & Co, 1962
Nihil Obstat: Arthur J. Scanlan, STD
Imprimatur: +C. Eykens (Antwerp).

  

 



Dei via est íntegra
Our Lady of the Rosary, 144 North Federal Highway (US#1), Deerfield Beach, Florida 33441  954+428-2428
Authentic  Catholic Mass, Doctrine, and Moral Teaching -- Don't do without them -- 
Don't accept one without the others!