Regína sacratíssimi Rosárii, ora pro nobis!
  

Die 5 Julii
S. Antonii Maríæ Zaccaria, Confessoris

Introitus 1.Cor. ii: 4.

Sermo meus et prædicátio mea non in persuasibílibus humánæ sapiéntiæ verbis, sed in ostensióne spíritus et virtútis. Ps. cx: 1 Confitébor tibi, Dómine, in toto corde meo, in consílio justórum et congregatióne. Glória Patri. Sermo.

Oratio.

Fac nos, Dómine Deus, supereminéntem Jesu Christi sciéntiam, spíritu Pauli Apóstoli, edíscere: qua beátus Antónius María mirabíliter erudítus, novas in Ecclésia tua clericórum et vírginum famílias congregávit. Per eúndem Dóminum.

Et fit Commemoratio Octavæ Ss. Apostolorum Oratio.

Deus, qui hodiérnam diem Apostolórum tuórum Petri et Pauli martýrio consecrásti: da Ecclésiæ tuæ, eórum in ómnibus sequi præcéptum; per quos religiónis sumpsit exórdium. Per Dóminum nostrum.

1. Tim. iv: 8-16.

Léctio Epístolæ beáti Pauli Apóstoli ad Timótheum.
Caríssime: Píetas ad ómnia útilis est: promissiónem habens vitæ, quæ nunc est, et futúræ. Fidélis sermo et omni acceptióne dignus. In hoc enim laborámus et maledícimur, quia sperámus in Deum vivum, qui est Salvátor ómnium hóminum, maxime fidélium. Prǽcipe hæc et doce. Nemo adolescéntiam tuam contémnat: sed exémplum esto fidélium in verbo, in conversatióne, in caritáte, in fide, in castitáte. Dum vénio, atténde lectióni, exhortatióni et doctrínæ. Noli neglégere grátiam, quæ in te est, quæ data est tibi per prophétiam, cum impositióne mánuum presbytérii. Hæc meditáre, in his esto: ut proféctus tuus maniféstus sit ómnibus. Attende tibi et doctrínæ: insta in illis. Hoc enim fáciens, et teípsum salvum fácies, et eos qui te áudiunt.

Graduale: Philipp. i: 8-9.

Testis mihi est Deus, quo modo cúpiam omnes vos in viscéribus Jesu Christi. Et hoc oro, ut cáritas vestra magis ac magis abúndet in sciéntia et in omni sensu. Ibid.,10 Ut probétis potióra, ut sitis sincéri et sine offénsa in diem Christi.
Allelúja, allelúja. Ibid.,11 Repléti fructu justítiæ per Jesum Christum, in glóriam et laudem Dei. Allelúja.

In Missis votivis post Septuagesimam, omissis Allelúja et Versu sequenti, dicitur: Tractus: 2 Cor.x: 17-18.

Qui gloriátur, in Dómino gloriétur: non enim qui seípsum comméndat, ille probátus est: sed quem Deus comméndat. Gal. vi: 14 Mihi autem absit gloriári, nisi in Cruce Dómini nostri Jesu Christi: per quem mihi mundus crucifíxus est, et ego mundo. Philipp. i: 21 Mihi vívere Christus est, et mori lucrum.

Tempore autem Paschali omittitur Graduale, et ejus loco dicitur:

Allelúja, allelúja. 2 Cor. vii: 4 Replétus sum consolatióne, superabúndo gáudio in omni tribulatióne nostra. Allelúja. Ibid. vi: 13 Tamquam fíliis dico: dilatámini et vos. Allelúja.

Mare. x: 15-21

Sequéntia sancti Evangélii secúndum Marcum.

In illo témpore: Dixit Jesus discípulis suis: «Quisquis non recéperit regnum Dei velut párvulus, non intrábit in illud.» Et compléxans párvulos et impónens manus super illos, benedicébat eos. Et cum egréssus esset in viam, procúrrens quidam, genu flexo ante eum, rogábat eum: «Magíster bone, quid fáciam, ut vitam ætérnam percípiam?» Jesus autem dixit ei: «Quid me dicis bonum? Nemo bonus, nisi unus Deus. Præcépta nosti: Ne adúlteres, ne occídas, ne furéris, ne falsum testimónium díxeris, ne fraudem féceris, honora patrem tuum et matrem.» At ille respóndens, ait illi: «Magíster, hæc ómnia observávi a juventúte mea.» Jesus autem intúitus eum, diléxit eum et dixit ei: «Unum tibi deest: vade, quæcúmque habes, vende et da paupéribus, et habébis thesáurum in cælo: et veni, séquere me.» 

Credo

Offertorium: Ps. cxxxvii: 1-2

In conspéctu Angelórum psallam tibi: adorábo ad templum sanctum tuum, et confitébor nómini tuo.

Secreta

Ad mensam cœléstis convívii fac nos, Dómine, eam mentis et córporis puritátem afférre, qua beátus Antónius María, hanc sacratíssimam hóstiam ófferens, mirífice ornátus enítuit. Per Dóminum.

Pro Octava Ss. Apostolorum Secreta.

Hóstias, Dómine, quas nómini tuo sacrándas offérimus, apostolica prosequátur orátio: per quam nos expiári tríbuas et deféndi.  Per Dóminum.

Præfatio de Apostolis.

Communio. Philipp. viii: 17

Imitatóres mei estóte, fratres, et observáte eos, qui ita ámbulant, sicut habétis formam nostram.

Postcommunio

Cœlésti dape, qua pasti sumus, Dómine Jesu Christe, eo corda nostra caritátis igne flamméscant: quo beátus Antónius María salutáris hóstiæ vexíllum, contra Ecclésiæ tuæ hostes, éxtulit ad victóriam: Qui vivis.

Pro Octava Ss. Apostolorum Postcommunio.

Quos cœlésti, Dómine, aliménto satiásti: apostólicis intercessiónibus ab omni adversitáte custódi. Per Dóminum.

 



Dei via est íntegra
Our Lady of the Rosary, 144 North Federal Highway (US#1), Deerfield Beach, Florida 33441  954+428-2428
Authentic  Catholic Mass, Doctrine, and Moral Teaching -- Don't do without them -- 
Don't accept one without the others!