Regína sacratíssimi Rosárii, ora pro nobis!
  

Die 29 Augusti
In Decollatióne S. Joánnis Baptístæ

Introitus: Ps.cxviii

Loquébar de testimóniis tuis in conspéctu regum, et non confundébar: et meditábar in mandátis tuis, quæ diléxi nimis. [Ps. xci: 2]. Bonum est confitéri Dómino: et psállere nómini tuo, Altíssime. v. Glória Patri. Loquébar.

Sancti Joánnis Baptístæ Præcursóris, et Mártyris tui, quǽsumus, Dómine, veneránda festívitas: salutáris auxílii nobis præstet efféctum: Qui vivis

Deus, qui inter cétera poténtiæ tuæ mirácula étiam in sexu frágili victóriam martýrii contulísti: concéde propítius; ut, qui beátæ Sabínæ Mártyris tuæ natalítia cólimus, per ejus ad te exémpla gradiámur. Per Dóminum.

Jeremias i: 17-19

Léctio Jeremíæ Prophétæ.
In diébus illis: Factum est verbum Dómini ad me, dicens: «Accínge lumbos tuos, et surge, et lóquere ad eos ómnia quæ ego præcípio tibi. Ne formídes a fácie eórum : nec enim timére te fáciam vultum eórum. Ego quippe dedi te hódie in civitátem munítam, et in colúmnam férream, et in murum ǽreum, super omnem terram, régibus Juda, princípibus ejus, et sacerdótibus, et pópulo terræ. Et bellábunt advérsum te, et non prævalébunt : quia ego tecum sum, ait Dóminus, ut líberem te.»

Justus ut palma florébit: sicut cedrus Líbani multiplicábitur in domo Dómini. [v. Ibid., 3] Ad annuntiándum mane misericórdiam tuam, et veritátem tuam per noctem.

Allelúja, allelúja. [Osee xiv: 6] Justus germinábit sicut lílium: et florébit in ætérnum ante Dóminum. Allelúja.

Luc. xviii: 9-14
 +  Sequéntia sancti Evangélii secúndum Lucam.

In illo témpore: Misit Heródes ac ténuit Joánnem, et vinxit eum in cárcere propter Herodíadem, uxórem Philíppi fratris sui, quia dúxerat eam. Dicébat enim Joánnes Heródi: «Non licet tibi habére uxórem fratris tui.» Heródias autem insidiabátur illi, et volébat occídere eum, nec póterat. Heródes enim metuébat Joánnem, sciens eum virum iustum et sanctum: et custodiébat eum, et audíto eo multa faciébat, et libénter eum audiébat. Et cum dies oportúnus accidísset, Heródes natális sui cœnam fecit princípibus, et tribúnis, et primis Galilǽæ. Cumque introísset fília ipsíus Herodíadis, et saltásset, et placuísset Heródi, simúlque recumbéntibus rex ait puéllæ: «Pete a me quod vis, et dabo tibi, et jurávit illi: Quia quicquid petíeris dabo tibi, licet dimídium regni mei» Quæ cum exísset, dixit matri suæ: «Quid petam?» Et illa dixit: «Caput Joánnis Baptístæ.» Cumque introísset statim cum festinatióne ad regem, petívit, dicens: «Volo ut prótinus des mihi in disco caput Joánnis Baptístæ.» Et contristátus est rex: propter jusjurándum, et propter simul discumbéntes nóluit eam contristáre: sed misso speculatóre, præcépit aférri caput eius in disco. Et decollávit eum in cárcere. Et átulit caput eius in disco: et dedit illud puéllæ, et puélla dedit matri suæ. Quo audíto discípuli ejus venérunt, et tulérunt corpus ejus: et posuérunt illud in monuménto.

In virtúte tua, Dómine, lætábitur justus, et super salutáre tuum exsultábit veheménter: desidérium ánimæ ejus tribuísti ei.

Múnera, quæ tibi, Dómine, pro sancti Mártyris tui Joánnis Baptístæ passióne deférimus: quǽsumus, ut ejus obténtu nobis profíciant ad salútem. Per Dóminum.

Hostias tibi, Dómine, beátæ Sabinæ Martýris tuæ dicátas méritis, benígnus assúme: et ad perpétuum nobis tríbue proveníre subsídium. Per Dóminum.

Posuísti, Dómine, in cápite ejus corónam de lápide pretióso.

Cónferat nobis, Dómine, sancti Joánnis Baptístæ solémnitas: ut et magnífica sacraménta, quæ súmpsimus, significáta venerémur, et in nobis pótius édita gaudeámus. Per Dóminum.

Divíni múneris largitate satiáti, quǽsumus, Dómine Deus noster: ut, intercedénte beáta Sabinæ Martýre tua, in ejus semper participatióne vivámus.  Per Dóminum.

Our Lady of the Rosary, 144 North Federal Highway (US#1), Deerfield Beach, Florida 33441  954+428-2428
Authentic  Catholic Mass, Doctrine, and Moral Teaching -- Don't do without them -- 
Don't accept one without the others!