Dominica Resurrectionis
Duplex I classis cum octava privilegiata I classis
Statio ad S. Mariam majorem
Introitus: Ps. 138: 18, 5-6
Resurrexi, et adhuc tecum sum, allelúja: posuísti super me manum tuam, allelúja: mirábilis facta est sciéntia tua, allelúja, allelúja. [Ps. ibid., 1-2]. Dómine, probásti me, et cognovísti me: tu cognovísti sessiónem meam, et resurrectiónem meam. Glória Patri. Resurrexi.
Collect:
Deus, qui hodiérna die per Unigénitum tuum, æternitátis nobis áditum devícta morte reserásti: vota nostra, quæ preveniéndo aspiras, étiam adjuvándo proséquere. Per eúmdem Dóminum.
1 ad Cor. v: 7-8
Léctio Epístolæ beáti Pauli
Apóstoli ad Corinthios.
Fratres: Expurgáte vetus ferméntum, ut sitis nova conspérsio, sicut estis
ázymi. Etenim Pascha nostrum immolátus est Christus. Itaque epulémur: non in
ferménto véteri, neque in ferménto malítiæ, et nequitiæ: sed in ázymis
sinceritátis, et veritátis.
Graduale Ps. cxvii: 24 et 1
Hæc dies, quam fecit Dóminus: exsultémus, et lætémur in ea. V.
Confitémini Dómino, quóniam bonus: quóniam in sǽculum misericórdia
ejus.
Allelúja, allelúja. [1 Cor. 5: 7] Pascha
nostrum immolátus est Christus.
Sequéntia
Victimæ pascháli laudes ímmolent Chrístiani.
Agnus redémit oves: Christus ínnocens Patri reconciliávit peccatóres.
Mors et vita duéllo conflixére mirándo: dux vitæ mórtus, regnat vivus.
Dic nobis, María, quid vidísti in via?
Sepúlcrum Christi vivéntis: et glóriam vidi resurgéntis.
Angélicos testes, sudárium, et vestes.
Suréxit Christus spes mea: præcédet vos in Galilǽam.
Scimus Christum surrexíse a mórtuis vere: tu nobis, victor Rex, miserére.
Amen. Allelúja.
Sequéntia dicitur usque ad Sabbatum in Albis inclusive.
Marc. xvi: 1-7
Sequéntia sancti Evangélii secúndum Marcum.
In illo témpore:.María Magdaléne et María Jacóbi et Salóme emérunt
arómata ut veniéntes únguerent Jesum. Et valde mane una sabbatórum, véniunt
ad monuméntum, orto iam sole. Et dicébant ad ínvicem: Quis revólvet nobis
lápidem ab ostio monuménti? Et respiciéntes vidérunt revolútum lápidem.
Erat quippe magnus valde. Et introëuntes in monuménum vidérunt júvenem
sedéntem in dextris, coopértum stola cándida, et obstipuérunt. Qui dicit
illis: Nolíte expavéscere: Jesum quǽritis Nazarénum crucifíxum:
surréxit, non est hic, ecce locus ubi posuérunt eum. Sed ite, dícite
discípulis ejus, et Petro, quia præcédit vos in Galilǽam: ibi eum vidébitis,
sicut dixit vobis.
Credo.
Offertorium: Ps. lxxv: 9-10.
Terra trémuit, et quiévit, dum resúrgeret in judício Deus, allelúja.
Secreta:
Súcipe, quǽasumus, Dómine, preces pópuli tui cum oblatiónibus hostiárum: ut paschálibus initiáta mystériis, ad æternitátis nobis medélam, te operánte, profíciant. Per Dóminum.
Præfatio Paschalis: "Te quidem Dómine, omni témpore, sed in hac potíssimum die."
Infra Actionem: "Communicántes" et "Hanc igitur oblatiónem" propria. Et sic dicitur usque ad Sabbatum in Albis inclusive.
Communio: 1 Cor. v: 7-8
Pascha nostrum immolátus est Christus, allelúja: itaque epulémur in ázymis sinceritátis, et veritátis, allelúja, allelúja.
Postcommunio:
Spíritum nobis, Dómine, tuæ caritátis infúnde: ut, quos sacraméntis paschálibus satiásti, tua fácias pietáte concórdes. Per Dominum... in unitáte ejúsdem.
Post Dóminus vobíscum dicitur: "Ite,
Missa est, allelúja, allelúja." R. "Deo
grátias, allelúja, allelúja."
Et sic dicitur usque
ad Sabbatum in Albis inclusive, juxta Rubricas.
