Dominica Tertia post Pentecosten
Infra Octavam Sacratissimi Cordis Jesu
II Classis
Introitus: Ps. xxiv: 16 et 18
Respice in me, et miserére mei, Dómine: quóniam únicus, et pauper sum ego: vide humilitátem meam, et labórem meum: et dimítte ómnia peccáta mea, Deus meus. [Ps. ibid., 1-2]. Ad te Dómine, levávi ánimam meam: Deus meus, in te confído, non erubéscam. [V.] Glória Patri. Respice.
Oratio:
Protéctor in te sperántium, Deus, sine quo nihil est válidum, nihil sanctum: multíplica super nos misericórdiam tuam; ut, te rectóre, te duce, sic transeámus per bona temporália, ut non amittámus ætérna. Per Dóminum.
Et fit commemoratio Octava Sacratissimi Cordis Jesu:
Deus qui nobis, in Corde Fílli tui, nostris vulneráto peccátis, infinítos dilectiónis thesáuros misericórditer largíri dignáris; concéde, quǽsumus, ut illi devótum pietátis nostræ præstántes obséquium, dignæ quoque satisfactiónis exhibeámus offícium. Per eúmdemDóminum.
1 Petri. v: 6-11
Léctio Epístolæ beáti Petri Apóstoli.
Caríssimi: Humiliámini
sub poténti manu Dei, ut vos exáltet in témpore visitatiónis: omnem sollicitúdinem
vestram projiciéntes in eum, quóniam ipsi cura est de vobis. Sóbrii estóte,
et vigiláte: quia adversárius vester diábolus tamquam leo rúgiens círcuit,
quærens quem dévoret: cui resístite fortes in fide: sciéntes eámdem passiónum
ei, quæ in mundo est, vestræ fraternitáti fieri. Deus autem omnis grátiæ,
qui vocávit nos in ætérnam suam glóriam in Christo Jesu, módicum passos
ipse perfíciet, confirmábit, solidabítque. Ipsi glória, et impérium in sǽcula
sæculórum. Amen.
Graduale Ps. liv: 23, 17, et 19
Jacta cogitátum tuum in
Dómino: et ipse te enútriet. V. Dum clamárem
ad Dóminum, exaudívit vocem meam ab his, qui appropínquant mihi.
Allelúja, allelúja. [Ps.
vii: 12] Deus judex justus, fortis et pátiens, numquid iráscitur per
singulos dies? Allelúja.
Luc.
xv: 1-10
+ Sequéntia sancti Evangélii secúndum Lucam
In illo témpore: Erant appropinquántes ad Jesum publicáni et peccatóres, ut audírent illum. Et murmurábant pharisǽi et scribæ, dicéntes: «Quia hic peccatóres récipit, et mandúcat cum illis.» Et ait ad illos parábolam istam, dicens: «Quis ex vobis homo, qui habet centum oves: et si perdíderit unam ex illis, nonne dimíttit nonagintanóvem in desérto, et vadit ad illam, quæ períerat, donec invéniat eam? Et cum invénerit eam, inpónit in húmeros suos gaudens: et véniens domum cónvocat amícos et vicínos, dicens illis: “Congratulámini mihi, quia invéni ovem meam, quæ períerat”? Dico vobis quod ita gaudium erit in cælo super uno peccatóre pæniténtiam agénte, quam super nonagintanóvem justis qui non índigent pæniténtia. Aut quæ múlier habens drachmas decem, si perdíderit drachmam unam, nonne accéndit lucérnam, et evérrit domum et quærit diligénter, donec invéniat? Et cum invénerit cónvocat amícas et vicínas dicens: “Congratulámini mihi, quia invéni drachmam quam perdíderam”? Ita dico vobis: gáudium erit coram Angelis Dei super uno peccatóre pæniténtiam agénte.»
Credo.
Offertorium: Ps. ix: 11, 12, et 13.
Sperent in te omnes, qui novérunt nomen tuum, Dómine: quóniam non derelínquis quæréntes te: psállite Dómino, qui hábitat in Sion: quóniam non est oblítus oratiónem páuperum.
Secreta:
Respice, Dómine, múnera suplicántis Ecclésiæ: et salúti credéntium perpétua sanctificatióne suménda concéde. Per Dóminum.
Et fit commemoratio Octava Sacratissimi Cordis Jesu:
Respice, quǽsumus, Dómine, ad ineffábilem Cordis dilécti Fílli tui caritátem: ut quod offérimus sit tibi munus accéptum et nostrórum expiátio delictórum. Per eúmdem Dominum.
Præfátio de Sacratissimi
Cordis Jesu, ratione Octavæ;
sed, si Commemoratio Octavæ sit omittenda,
dicitur Præfatio de Ssma Trinitate, juxta Rubricas.
Communio: Luc. xv: 10
Dico vobis: gáudium est Angelis Dei super uno peccatóre pæniténtiam agénte.
Postcommunio:
Sancta tua nos, Dómine sumpta vivíficent: et misericórdiæ sempitérnæ prǽparent expiátos. Per Dóminum.
Et fit commemoratio Octava Sacratissimi Cordis Jesu:
Prǽbeant nobis, Dómine Jesu, divínum tua sancta fervórem: quo dulcíssimi Cordis tui suavitáte percépta, discámus terréna despícere, et amáre cæléstia: Qui vivis.
Act of Reparation to the Sacred Heart of Jesus
