Dominica Decima Quarta Post Pentecosten
II Classis
To English Version
Introitus: Ps. lxxxiii: 10-11
Protéctor noster, áspice, Deus, et réspice in faciem Christi tui: quia
mélior est dies una in átriis tuis super míllia. [Ps
ibid., 2-3]. Quam dilécta tabernácula tua, Dómine virtútum!
Concupíscit, et déficit ánima mea in átria Dómini. Gloria Patri. Protéctor
noster.
Collect:
Custódi, Dómine, quǽsumus, Ecclésiam tuam propitiatióne perpétua:
et quia sine te lábitur humána mortálitas; tuis semper auxíllis et
abstrahátur a nóxiis, et ad salutária dirigátur. Per Dominum.
2. ad poscenda suffragia Sanctorum, 3. ad libitum eligenda
ad Gal. v: 16-24
Lectio Epistolae beati Pauli Apostoli ad Galatas.
Fratres: Spíritu ambuláte, et desidéria carnis non perficiétis. Caro enim
concupíscit advérsus spíritum, spíritus autem advérsus carnem: hæc enim
sibi ínvicem adversántur, ut non quæcúmque vultis, illa faciátis. Quod si
spíritu ducímini, non estis sub lege. Manifésta autem sunt ópera carnis,
quæ sunt fornicátio, inmundítia, luxúria, idolórum sérvitus, venefícia,
inimicítiæ, contentiónes, æmulatiónes, iræ, rixæ, dissensiónes, sectæ,
invídiæ, homicídia, ebrietátes, comesatiónes, et his simília: quæ prǽdico
vobis, sicut prædíxi: quóniam, qui tália agunt, regnum Dei non
consequéntur. Fructus autem Spíritus est: cáritas, gáudium, pax, patiéntia,
benignitas, bonitas, longanímitas, mansuetúdo, fides, modéstia, continéntia,
cástitas. Advérsus huiúsmodi non est lex.
Qui autem sunt Christi, carnem crucifixérunt cum vitiis et concupiscéntiis.
Graduale Ps. xxxxxx
Bonum est confídere in Dómine, quam confídere in hómine. V.
Bonum est speráre in Dómino, quam speráre in princípibus.
Allelúia, allelúia. [Ps. xciv: 1] Veníte
exsultémus Dómino, jubilémus Deo salutári nostro. Allelúia.
Matth.
vi: 24-33
+
Sequentia sancti Evangelii secundum Matthǽum.
In illo tempore: Dixit Jesus discípulis suis: "Nemo potest duóbus
dóminis servíre: aut enim unum ódio habébit, et álterum diliget: aut unum
sustinébit, et alterum contémnet. Non potéstis Deo servíre et mamónæ. Ideo
dico vobis, ne sollíciti sitis ánimae vestræ quid manducétis, neque córpori
vestro quid induámini. Nonne ánima plus est quam esca: et corpus plus est quam
vestiméntum? Respícite volatília cæli, quóniam non serunt, neque metunt,
neque cóngregant in hórrea: et Pater vester cæléstis pascit illa. Nonne vos
magis pluris estis illis? Quis autem vestrum cógitans potest adjícere ad
statúram suam cúbitum unum? Et de vestiménto quid sollíciti estis?
Consideráte lilia agri, quómodo crescunt: non labórant, necque nent. Dico
autem vobis, quóniam nec Sálomon in omni glória sua coopértus est sicut unum
ex istis. Si autem fœnum agri, quod hódie est, et cras in clíbanum míttitur,
Deus sic vestit: quanto magis vos módicæ fidei? Nolite ergo sollíciti esse,
dicentes: 'Quid manducábimus,' aut 'quid bibemus,' aut 'quo operiemur'? Hæc
enim ómnia gentes inquírunt. Scit enim Pater vester, quia his ómnibus
indigétis. Quǽrite ergo primum regnum Dei, et justítiam eius: et hæc
ómnia adjiciéntur vobis."
Credo.
Offertorium: Ps. xxxiii: 8 et 9.
Immíttet Angelus Dómini in circúitu timéntium eum, et erípet eos:
gustáte, et vidéte, quóniam suávis est Dóminus.
Secreta:
Concéde nobis, Dómine, quǽsumus, ut hæc hóstia salutáris, et
nostrórum fiat purgátio delictórum, et tuæ propitátio potestátes. Per
Dominum.
2. ad poscenda suffragia Sanctorum. 3.
ad libitum eligenda
Præfatio de Ssma Trinitate
Communio: Matth. vi: 33
Primum quǽrite regnum Dei, et ómnia adjiciéntur vobis, dicit Dóminus.
Postcommunio:
Purificent semper et múniant tua sacraménta nos, Deus: et ad perpétuæ
ducant salvatiónis efféctum. Per Dominum.
2. ad poscenda suffragia Sanctorum. 3.
ad libitum eligenda
