Dominica Decima Nona Post Pentecosten
II Classis
English Text
Introitus:
Salus pópuli ego sum, dicit Dóminus: de quacúmque
tribulatióne clamáverint ad me, exáudiam eos: et ero illórum Dóminus in
perpétuum. [Ps. lxxvii: 1]
Atténdite, pópule meus, legem meam: inclináte aurem vestram in verba oris
mei. Glória Patri. Salus pópuli.
Collect:
Omnípotens et miséricors Deus, univérsa nobis
adversántia propitiátus exclúde: ut mente et córpore páriter expedíti,
quæ tua sunt, líberis méntibus exsequámur. Per Dóminum.
2. ad poscenda suffragia Sanctorum.
3. ad libitum eligenda
ad Ephesios vi: 23-28
Léctio Epístolæ beáti Pauli Apóstoli ad Ephesios.
Fratres: Renovámini spíritu mentis vestræ, et
indúite novum hóminem, qui secúndum Deum creátus est in justítia et
sanctitáte veritátis. Propter quod deponéntes mendácium, loquímini
veritátem unusquísque cum proximo suo: quóniam sumus ínvicem membra.
Irascímini et nolíte peccáre: sol non óccidat super iracúndiam vestram.
Nolíte locum dare diábolo: qui furabátur, iam non furétur; magis autem
labóret, operándo mánibus suis, quod bonum est, ut hábeat unde tríbuat
necessitátem patiénti.
Graduale Ps. cxl: 2
Dirigátur orátio mea, sicut incénsum in conspéctu
tuo, Dómine. V. .Elevátio
mánuum meárum sacrifícium vespertínum.
Allelúja, allelúja. [Ps. civ] Confitémini Dómino, et invocáte nomen ejus:
annuntiát inter gentes ópera ejus. Allelúja.
Matth. xxii: 1-14
+
Sequéntia sancti Evangélii secúndum Matthǽum.
In illo témpore: Loquebátur Jesus princípibus
sacerdótum et pharisǽis in parábolis, dicens: "Simile factum est
regnum cælórum hómini regi qui fecit núptias filio suo. Et misit servos suos
vocáre invitátos ad núptias et nolébant veníre. Iterum misit álios servos
dicens: 'Dicite invitátis: Ecce prándium meum parávi, tauri mei et altília
occisa sunt, et ómnia paráta: veníte ad núptias.' Illi autem negléxerunt:
et abiérunt álius in villam suam, álius vero ad negotiatiónem suam: réliqui
vero tenuérunt servos eius et contuméliia afféctos occidérunt. Rex autem cum
audísset, irátus est et missis exercítibus suis pérdidit homicídas illos,
et civitátem illórum succéndit. Tunc ait servis suis: Núptiæ quidem
parátæ sunt, sed qui invitáti erant non fuerunt digni. Ite ergo ad éxitus
viárum et quoscúmque invenéritis vocáte ad núptias.' Et egréssi servi eius
in vias, congregavérunt omnes, quos invenérunt, malos et bonos: et implétæ
sunt núptiæ discumbéntium. Intrávit autem rex, ut vidéret discumbéntes, et
vidit ibi hóminem non vestítum veste nuptiáli. Et ait illi: 'Amíce, quómodo
huc intrásti non habens vestem nuptiálem?' At ille obmútuit. Tunc dixit rex
minístris: "Ligátis mánibus et pedibus eius, et míttite eum in
ténebras exterióres: ibi erit fletus et stridor déntium. Multi enim sunt
vocáti, pauci vero elécti.'"
Credo
Offertorium: Ps. cxxxvii: 7
Si ambulávero in médio tribulatiónis, vivificábis
me, Dómine: et super iram inimicórum meórum exténdes manum tuam, et salvum
me fáciet déxtera tua.
Secreta:
Hæc múnera, quǽsumus, Dómine, quæ óculis tuæ
majestátis offérimus, salutária nobis esse concéde. Per Dóminum.
2. ad poscenda suffragia Sanctorum. 3. ad libitum eligenda
Præfatio de Ssma Trinitate
Communio: Ps. cxviii: 4-5
Tu mandásti mandáta tua custodíri nimis: útinam
dirigántur viæ meæ, ad custodiéndas justificatiónes tuas.
Postcommunio:
Tua nos, Dómine, medicinális operátio, et a nostris
perversitátibus cleménter expédiat, et tuis semper fáciat inhærére
mandátis. Per Dominum.
2. ad poscenda suffragia Sanctorum. 3. ad libitum eligenda
