Dominica Secunda post Pentecosten
Infra Octavam Sanctissimi Corpus Christi
II Classis
Introitus: Ps. xvii. 19-20
Factus est Dóminus protéctor meus, et edúxit me in latitúdinem: salvum me fecit, quóniam vóluit me. [Ps. ibid., 2-3] Díligam te, Dómine, virtus mea: Dóminus firmaméntum meum et refúgium meum, et liberátor meus. [v.] Glória Patri. Factus est.
Oratio:
Sancti nóminis tui, Dómine, timórem páriter et amórem fac nos habére perpétuum: quia nunquam tua gubernatióne destítuis, quos in soliditáte tuæ dilectiónis instítuis. Per Dóminum.
Et fit Commemoratio Octavæ Sanctissimi Corporis Christi
Deus, qui nobis sub Sacraménto mirábili passiónis tuæ memóriam reliquísti: tribue, quǽsumus, ita nos Córporis et Sánguinis tui sacra mystéria venerári, ut redemptiónis tuæ fructum in nobis júgiter sentiámus. Qui vivis et regnas.
1 Joann. iii: 13-18
Léctio Epístolæ beáti Joánnis Apóstoli.
Caríssimi: Nolíte mirári, si odit vos
mundus. Nos scimus quóniam transláti sumus de morte ad vitam, quóniam dilígimus
fratres. Qui non díligit, manet in morte: omnis qui odit fratrem suum, homicída
est. Et scitis quóniam omnis homicída non habet vitam ætérnam in semetípso
manéntem. In hoc cognóvimus caritátem Dei, quóniam ille ánimam suam pro
nobis pósuit: et nos debémus pro frátribus ánimas pónere. Qui habúerit
substántiam hujus mundi, et víderit fratrem suum necessitátem habére et cláuserit
víscera sua ab eo: quómodo cáritas Dei manet in eo? Filíoli mei, non diligámus
verbo, neque lingua, sed ópere, et veritáte.
Graduale Ps. cxix. 1-2
Ad Dóminum, cum tribulárer,
clamávi, et exaudívit me. [v.] Dómine, líbera
ánimam meam a lábiis iníquis, et a lingua dolósa.
Allelúja, allelúja. [Ps.
vii: 2] Dómine Deus meus, in te sperávi: salvum me fac ex ómnibus
persequéntibus me, et líbera me. Allelúja.
Luc. xiv: 16-24
+ Sequéntia sancti Evangélii secúndum Lucam.
In illo témpore: Dixit Jesus Pharisǽis parábolam hanc: «Homo quidam fecit cœnam magnam, et vocávit multos. Et misit servum suum hora cœnæ dícere invitátis ut venírent, quia jam paráta sunt ómnia. Et cœpérunt simul omnes excusáre. Primus dixit ei: “Villam emi, et necésse hábeo exíre, et vidére illam: rogo te, habe me excusátum.” Et alter dixit: “Juga boum emi quinque, et eo probáre illa: rogo te, habe me excusátum.” Et álius dixit: “Uxórem duxi, et ídeo non possum veníre.” Et revérsus servus nuntiávit hæc dómino suo. Tunc irátus paterfamílias, dixit servo suo: “Exi cito in platéas, et vicos civitátis: et páuperes, ac débiles, et cæcos, et claudos íntroduc huc.” Et ait servus: “Dómine, factum est ut imperásti, et adhuc locus est.” Et ait dóminus servo: “Exi in vias et sepes: et compélle intráre, ut impleátur domus mea. Dico autem vobis, quod nemo virórum illórum, qui vocáti sunt, gustábit cœnam meam.”»
Credo.
Offertorium: Ps. vi: 5.
Dómine, convértere, et éripe ánimam meam: salvum me fac propter misericórdiam tuam.
Secreta:
Oblátio nos, Dómine, tuo nómini dicánda puríficet: et de die in diem ad cæléstis vitæ tránsferat actiónem. Per Dóminum.
Et fit Commemoratio Octavæ Sanctissimi Corporis Christi
Ecclésiæ tuæ, quǽsumus, Dómine, unitátis et pacis propítius dona concéde: quæ sub oblátis munéribus mýstice designántur. Per Dóminum.
Præfátio de Nativitate,
ratione Octavæ,
vel de Trinitate si Commemoratio Octavæ sit omittenda.
Communio: Ps. xii: 6
Cantábo Dómino, qui bona tríbuit mihi: et psallam nómini Dómini altíssimi.
Postcommunio:
Sumptis munéribus sacris, quǽsumus, Dómine: ut cum frequentatióne mystérii, crescat nostræ salútis efféctus. Per Dominum.
Et fit Commemoratio Octavæ Sanctissimi Corporis Christi
Fac nos, quǽsumus, Dómine, divinitátis tuæ sempitérna fruitióne repléri: quam pretiósi Córporis et Sánguinis tui temporális percéptio præfigúrat: Qui vivis.
