Dóminica Vigesima-quarta et Ultima post Pentecosten
II classis
The Siege and Destruction of Jerusalem by the Romans Under the
Command of Titus, A.D. 70
David Roberts - 1850
Introitus: Jerem. xxix: 11, 12, et 14
Dicit Dóminus: Ego cógito cogitatiónes pacis et non adflictiónis. Invocábitis me et Ego exáudiam vos et redúcam captivitátem vestram de cunctis locis. [Ps. lxxxiv: 2] Benedixísti, Dómine, terram tuam: avertísti captivitátem Jacob. Gloria Patri. Dicit Dóminus.
Oratio:
Excita, quǽsumus, Dómine, tuórum fidélium voluntátes: ut divini óperis fructum propénsius exsequéntes; pietátis tuæ remédia majóra percípiant. Per Dóminum.
2. ad poscenda suffragia Sanctorum. 3. Ad libitum eligenda.
Ad Colossénses i: 9-14
Léctio Epistolæ beáti Pauli Apóstoli ad Colossénses:
Fratres: Non cessámus pro vobis orántes, et postulántes ut impleámini
agnitióne voluntátis Dei, in omni sapiéntia et intelléctu spiritáli; ut
ambulétis digne Deo per ómnia placéntes: in omni ópere bono fructificántes,
et crescéntes in sciéntia Dei; in omni virtúte confortáti secúndum
poténtiam claritátis ejus in omni patiéntia, et longanimitáte cum gáudio,
grátias agéntes Deo Patri, qui dignos nos fecit in partem sortis sanctórum in
lúmine: qui erípuit nos de potesáte tenebrárum, et tránstulit in regnum
Fílii dilectiónis suæ, in quo habémus redemptiónem per sánguinem ejus,
remissiónem peccatórum
Graduale: Ps. xliii: 8-9
Liberásti
nos, Dómine, ex adfligéntibus nos: et eos qui nos odérunt confudísti. In Deo
laudábimur tota die et in nómine tuo confitébimur in sǽcula.
Allelúia,
allelúia. [Ps.cxxix: 1-2] De profúndis clamávi ad te, Dómine; Dómine,
exáudi oratiónem meam. Allelúia
Matthew xxiv: 15-35
†
Sequéntia sancti Evangélii secúundum Matthæum.
In illo tempore, dixit Jesus discípulis suis: Cum vidéritis abominatiónem
desolatiónis, quæ dicta est a Daniéle prophéta stantem in loco sancto: qui
legit, intéllegat: tunc qui in Judǽa sunt fúgiant ad montes, et qui in
tecto non descéndat tóllere áliquid de domo sua: et qui in agro non
revertátur tóllere túnicam suam. Væ autem prægnátibus, et nutriéntibus in
illis diébus. Oráte autem ut non fiat fuga vestra híeme, vel sábbato. Erit
enim tunc tribulátio magna, qualis non fuit ab inítio mundi usque modo neque
fiet. Et nisi breviáti fuíssent dies illi, non fíeret salva omnis caro: sed
propter eléctos breviabúntur dies illi. Tunc si quis vobis díxerit:
"Ecce hic est Christus," aut illic, nolite credere. Surgent enim
pseudochrísti, et pseudoprophétæ: et dabunt signa magna, et prodígia ita ut
in errórem inducántur, si fieri potest, etiam elécti. Ecce prædíxi vobis.
Si ergo díxerint vobis: "Ecce in desérto est," nolíte exíre.
"Ecce in penetrábilibus," nolite crédere. Sicut enim fulgur exit ab
Oriénte et paret usque in Occidéntem: ita erit et advéntus Fílii hóminis.
Ubicúmque fúerit corpus, illuc congregabúntur áquilæ. Statim autem post
tribulatiónem diérum illórum sol obscurábitur, et luna non dabit lumen suum,
et stellæ cadent de cælo, et virtutes cælórum commovebúntur: et tunc
parébit signum Fílii hóminis in cælo: et tunc plangent omnes tribus terræ,
et vidébunt Fílium hóminis veniéntem in núbibus cæli cum virtúte multa,
et majestáte. Et mittet angelos suos cum tuba, et voce magna: et congregábunt
eléctos ejus a quáttuor ventis, a summis cælórum usque ad términos eórum.
Ab árbore autem fici díscite parábolam: cum jam ramus eius tener fúerit, et
fólia nata, scitis quia prope est æstas: ita et vos cum vidéritis hæc ómnia
scitóte quia prope est in jánuis. Amen dico vobis, quia non præteríbit
generátio hæc, donec ómnia hæc fiant. Cælum et terra transíbunt, verba
vero mea non praeteríbunt.
Credo.
Offertorium: Ps.cxxix: 1-2
De profúndis clamávi ad te, Dómine; Dómine, exáudi oratiónem meam. De profúndis clamávi ad te, Dómine.
Secreta:
Propítius esto, Dómine, supplicatiónibus nostris: et pópuli tui oblatiónibus, precibúsque suscéptis, ómnium nostrum ad te corda convérte; ut a terrénis cupiditátibus liberáti, ad cæléstia desidéria transeámus. Per Dóminum.
2. ad poscenda suffragia Sanctorum. 3. Ad libitum eligenda.
Communio: Marc xi: 24
Amen dico vobis, quidquid orántes pétitis, crédite quia accipiétes, et fiet vobis.
Postommunio:
Concéde nobis, quǽsumus, Dómine: ut per hæc sacraménta quæ súmpsimus, quidquid in nostra mente vitiósum est, ipsórum medicatiónis dono curétur. Per Dóminum.
