Die 3 Septembris
S. Pii X Papæ et Conf.
English Text
Oath Against Modernism
Introitus: Ps. lxxxviii: 20-22
Extuli eléctum de pópulo, óleo sancto meo unxi eum: ut manus mea sit semper cum eo, et bráchium meum confírmet eum. [Ps. ibid., 2]. Grátias Dómini in ætéruum cantábo: per omnes generatiónes annuntiábo fidelitátem tuam ore meo. Glória Patri…. Extuli….
Collect:
Deus, qui ad tuéndam cathólicam fidem, et univérsa in Christo instauránda sanctum Pium, Summum Pontíficem, cælésti sapiéntia et apostolica fortitúdine replevísti: concéde propítius; ut, ejus institúta et exémpla sectántes, prǽmia consequámur ætérna. Per eúmdem Dóminum….
1 ad Thess. ii: 2-8
Léctio Epístolæ beáti Pauli Apóstoli ad Thessalonicénses.
Fratres: Fidúciam habúimus in Deo nostro loqui ad vos
evangélium Dei in multa sollicitúdine. Exhortátio enim nostra non de erróre
neque de immundítia neque in dolo; sed, sicut probáti sumus a Deo ut
crederétur nobis evangélium, ita lóquimur; non quasi homínibus placéntes,
sed Deo qui probat corda nostra. Neque enim aliquándo fúimus in sermóne
adulatiónis, sicut scitis, neque in occasióne avarítiæ, Deus testis est, nec
quæréntes ab homínibus glóriam neque a vobis óneri esse ut Christi
apóstoli, sed facti summus párvuli in médio vestrum, tamquam si nutrix
fóveat fílios suos. Ita desiderántes vos cúpide volébamus trádere vobis
non solum evangélium Dei, sed étiam ánimas nostras, quóniam caríssimi nobis
facti estis.
Graduale Ps. xxxix
Annuntiávi justítiam in cœtu magno; ecce lábia mea
non cohíbui: Dómine, tu nosti. v.
Justítiam tuam non abscóndi in corde meo; fidelitátem tuam et auxílium tuum
narrávi.
Allelúja, allelúja. [Ps. xxii: 5-6] Paras mihi mensam, inúngis óleo caput meum,
calix meus ubérrimus est. Allelúja.
Joann. xxi: 15-17
+ Sequéntia sancti Evangélii secúndum Joánnem.
In illo témpore: Dixit Jesus Simóni Petro: "Simon Joánnis, díligis me plus his?" Dicit ei: "Etiam, Dómine, tu scis quia amo te." Dicit ei: "Pasce agnos meos." Dicit ei íterum: "Simon Joánnis, díligis me?" Ait illi: "Etiam, Dómine, tu scis quia amo te." Dicit ei: "Pasce agnos meos." Dicit ei tértio: "Simon Joánnis, amas me?" Contristátus est Petrus, quia dixit ei tértio: "Amas me?" et dixit ei: "Dómine, tu ómnia nosti; tu scis quia amo te." Dixit ei: "Pasce oves meas."
Offertorium: Ps. xxxiii: 12.
Veníte, fílii, audíte me; timórem Dómini docébo vos.
Secreta:
Oblatiónibus nostris, quǽsumus, Dómine, benígne suscéptis, da nobis, ut hæc divína mystéria, sancto Pio, Summo Pontífice intercedénte, sincéris tractémus obséquiis et fidéli mente sumámus. Per Dóminum.
Communio: Joann. vi: 56-57
Caro mea vere est cibus, et sanguis meus vere est potus. Qui mandúcat meam carnem et bibit meum sánguinem, in me manet et ego in illo.
Postcommunio:
Mensæ cæléstis virtúte refécti, quǽsumus, Dómine Deus noster: ut, interveniénte sancto Pio, Summo Pontifice; fortes efficiámur in fide, et in tua simus caritáte concórdes. Per Dóminum.
