Die 21 Septembris S. Matthæi, Apostoli et Evangelistæ

Die 21 Septembris
S. Matthæi, Apostoli et Evangelistæ

[English Text]

Introitus: Ps. xxxvi: 30-31

Os justi meditábitur sapiéntiam, et lingua ejus loquétur judícium: lex Dei ejus in corde ipsíus. [Ps. ibid., 1] Noli æmulári in malignántibus: neque zeláveris faciéntes iniquitátem. Glória Patri. Os justi.

Oratio:

Beáti Apóstoli et Evangelístæ Matthǽi, Dómine, précibus adjuvémur: ut, quod possibílitas nostra non óbtinet, ejus nobís intercessióne donétur. Per Dóminum.

Ezech. 1, 10-14

Léctio Ezechiélis Prophétæ.
Similitúdo vultus quátuor animálium: fácies hóminis, et fácies leónis a dextris ipsórum quátuor: fácies autem bovis a sinístris ipsórum quátuor, et fácies áquillæ désuper ipsórum quátuor. Fácies eórum, et pennæ eórum exténtæ désuper: duæ pennæ singulórum jungebántur, et duæ tegébant córpora eórum: et unumquódque eórum coram fácie sua ambulábat: ubi erant ímpetus spíritus, illuc gradiebántur, nec revertebántur cum ambulárent. Et similitúdo animálium, aspéctus eórum quasi carbónum ignis ardéntium, et quasi aspéctus lampadárum. Hæc erat vísio discúrrens in médio animálium, splendor ignis, et de igne fulgur egrédiens. Et animália ibant, et revertebántur in similitúdinem fúlguris coruscántis.

Graduale: Ps. cxi: 1-2

Beátus vir qui timet Dóminum: in mandátis ejus cupit nimis. v. Potens in terra erit semen ejus: generátio rectórum benedicétur.

Allelúja, allelúja. v. Te gloriósis Apostolórum chorus laudat, Dómine. Allelúja.

Matth ix: 9-13

Sequéntia sancti Evangélii secúndum Matthǽum.

In illo témpore: Vidit Jesus hóminem sedéntem in telónio, Matthǽum nómine. Et ait illi: «Séquere me.» Et surgens, secútus est eum. Et factum est, discumbénte eo in domo, ecce multi publicáni, et peccatóres veniéntes, discumbébant cum Jesu, et discípulis ejus. Et vidéntes pharisǽi, dicébant discípulis ejus: «Quare cum publicánis, et peccatóribus mandúcat Magíster vester?» At Jesus áudiens, ait: «Non est opus valéntibus médicus, sed male habéntibus. Eúntes autem díscite quid est: “Misericórdiam volo, et non sacrifícium. Non enim veni vocáre justos, sed peccatóres.”»

Credo.

Offertorium: Ps. xx: 4-5.

Posuísti Dómine, in cápite ejus corónam de lápide pretióso: vitam pétiit a te et tribuísti ei, allelúja.

Secreta:

Supplicatiónibus beáti Matthǽi Apóstoli et Evangelístæ, quǽsumus, Dómine, Ecclésiæ tuæ commendétur oblátio: cujus magníficis prædicatiónibus erudítur. Per Dóminum.

Præfátio de Apostolis

Communio: Ps. 20: 6

Magna est glória ejus in salutári tuo: glóriam et magnum decórem impónes super eum, Dómine.

Postcommunio:

Percéptis Dómine, sacraméntis, beáto Matthǽo Apóstolo tuo et Evangelísta interveniénte, deprecamur: ut, quæ pro ejus celebráta sunt glória, nobis profíciant ad medélam. Per Dóminum.

In Missis votivis post Septuagesima omnia dicuntur ut supra, sed post Graduale, omissis Allelúja, et versu sequenti, dicitur:

Tractus: Ps xx: 3-4

Desidérium ánimæ ejus tribuísti ei: et voluntáte labiórum ejus non fraudásti eum. v. Quóniam prævenísti eum in benedictiónibus dulcédinis. v. Posuísti in cápite ejus corónam de lápide pretióso.

Tempore autem Paschali Missa Protexísti de Communi Martyrum 1° loco, cum Orationibus, Epistola, et Evangelio ut supra.