Commune Dedicationis Ecclesiæ
Introitus: Gen. xxviii: 17

[English Text]

Terríbilis est locus iste: hic domus Dei est, et porta cæli: et vocábitur aula Dei. (T.P. Allelúja, allelúja. [Ps. lxxxiii, 2-3] Quam dilécta tabernácula tua, Dómine virtútum! concupiscit, et déficit ánima mea in átria Dómini. Glória Patri.... Terríbilis est....

1 Oratio (in anniversario):

Deus, qui nobis per síngulos annos hujus sancti templi tui consecratiónis réparas diem, et sacris semper mystériis repræséntas incólumes: exáudi preces pópuli tui, et præsta; ut, quisquis hoc templum benefícia petitúrus ingréditur. cuncta se impetrásse lætétur. Per Dóminum.

2 Oratio in ipsa die Dedicationis Ecclesiæ et per Octavam, et quando varianda est Oratio, dicitur sequens:

Deus, qui invisibíliter ómnia cóntines, et temen pro salúte géneris humáni signa tuæ poténtiæ visibliter osténdis: templum hoc poténtia tuæ inhabitatiónis illústra, et concéde; ut omnes, qui huc deprecatúri convéniunt, ex quacúmque tribulatióne ad te clamáverint, consolatiónis tuæ benefícia consequántur. Per Dóminum.

Apoc. xxi: 2-5

Léctio libri Apocalýpsis beáti Joánnis Apóstoli.
In diébus illis: Vidi sanctam civitátem Jerúsalem novam vidi descendéntem de cælo a Deo, parátam sicut sponsam ornátam viro suo. Et audívi vocem magnam de throno dicéntem: "Ecce tabernáculum Dei cum homínibus, et habitábit cum eis." Et ipsi pópulus ejus erunt, et ipse Deus cum eis erit eórum Deus: et abstérget Deus omnem lácrimam ab óculis eórum: et mors ultra non erit, neque luctus, neque clamor, neque dolor erit ultra, quia prima abiérunt. Et dixit qui sedébat in throno: "Ecce nova fácio ómnia.

Graduale

Locus iste a Deo factus est, inæstimábile sacraméntum, irreprehensíbilis est. V. Deus, qui astat Angelórum chorus, exáudi preces servórum tuórum.
Allelúja, allelúja. [Ps. cxxxvii, 2] Adorábo ad templum sanctum tuum: et confitébor nómini tuo, Allelúja.

Post Septuagesima: Tractus Ps. cxxiv: 1-2

Qui confídunt in Dómino, sicut mons Sion: non conmovébitur in ætérnum, qui hábitat in Jerúsalem. V. Montes in circúitu ejus, et Dóminus in circúitu pópuli sui, ex hoc nunc, et usque in sǽculum.

Tempore autem Paschali: Allelúja

Allelúja, allelúja. [Ps. cxxxvii, 2] Adorábo ad templum sanctum tuum: et confitébor nómini tuo, Allelúja. V. Bene fundáta es domus Dómini supra firmam petram, Allelúja.

 Luc. xix: 1-10

†  Sequéntia sancti Evangélii secúndum Lucam.
In illo témpore: Ingréssus Jesus perambulábat Jéricho. Et ecce vir nómine Zacchǽus: et hic prínceps erat publicanórum, et ipse dives: et quærébat vidére Jesum, quis esset: et non póterat præ turba, quia statúra pusíllus erat. Et præcúrrens ascéndit in árborem sycómorum ut vidéret eum: quia inde erat transitúrus. Et cum venísset ad locum, suspíciens Jesus vidit illum, et dixit ad eum: "Zacchǽe, festínans descénde; quia hódie in domo tua opórtet me manére." Et festínans descéndit, et excépit illum gaudens. Et cum vidérent omnes murmurábant, dicéntes, quod ad hóminem peccatórem divertísset. Stans autem Zacchǽus, dixit ad Dóminum: "Ecce dimídium bonórum meórum, Dómine, do paupéribus: et si quid áliquem defraudávi, reddo quádruplum." Ait Jesus ad eum: "Quia hódie, salus dómui huic facta est: eo quod et ipse fílius sit Abrahæ. Venit enim Fílius hóminis quǽrere, et salvum fácere, quod períerat.

Credo.

Offertorium: 1 Paral. xxix: 17 et 18

Dómine, Deus, in simplicitáte cordis mei lætus óbtuli univérsa; et pópulum tuum, qui repértus est, vidi cum ingénti gáudio: Deus Israël, custódi hanc voluntátem, alleluja.

1 Secreta:

Annue, quǽsumus, Dómine, précibus nostris:
{ut quicúmque intra templi hujus, cujus anniversárium dedicatiónis diem celebrámus, ámbitum continémur, plena tibi, atque perfécta Córporis et ánimæ devotióne placeámus}
ut, dum hæc vota prǽséntia réddimus, ad ætérna prǽmia, te adjuvánte, perveníre mereámur. Per Dóminum.

2 Oratio in ipsa die Dedicationis Ecclesiæ et per Octavam, et quando varianda est Oratio, dicitur sequens:

Deus, qui sacrandórum tibi auctor es múnerum, effúnde super hanc oratiónis domum benedictiónem tuam: ut ab ómnibus in ea invocántibus nomen tuum, defensiónis tuæ auxíllium sentiátur. Per Dóminum.

Præfatio communis

Communio: Matth. xxi: 13

Domus meas, domus oratiónis vocábitur, dicit Dóminus: in ea omnis, qui petit, áccipit: et qui quærit, invenit, et pulsánti aperiétur. (T.P. Allelúja.)

1 Postcommunio:

Deus, qui de vivis et électis lapídibus ætérnum majestáti tuæ prǽparas habitáculum: auxilliáre pópulo tuo supplicánti; ut, quod Ecclésiæ tuæ corporálibus próficit spátiis spirituálibus amplificétur augméntis.. Per Dominum.

2 In ipsa die Dedicationis Ecclesiæ et per Octavam, et quando varianda est Oratio, dicitur sequens:

Quǽsumus,omnípotens Deus: ut in hoc loco, quem nómini tuo indígni dedicávimus, cunctis peténtbus aures tuæ pietátis accómmodes. Per Dóminum.