Die 24 Junii
In Nativitáte S. Joannis Baptistæ
I Classis cum Octava communi
Introitus: Isai: il: 1 et 2
De ventre matris meæ vocávit me Dóminus nómine meo: et pósuit os meum ut gládium acútum: sub teguménto manus suæ protéxit me, et pósuit me quasi sagíttam eléctam. [Ps. xci: 2]. Bonum est confitéri Dómino: et psállere nómini tuo, Altíssime. V. Glória Patri. De ventre.
Oratio:
Deus, qui præséntem diem honorábilem nobis in beáti Joánnis nativitáte fecísti: da pópulis tuis spitituálium grátiam gaudiórum; et ómnium fidélium mentes dírige in viam salútis ætérnæ. Per Dóminum.
Isaias xlix 1-3, 5, 6, 7
Léctio
Isaíæ Prophétæ.
Audíte
insúlæ, et atténdite, pópuli de longe: Dóminus ab útero vocávit me, de
ventre matris meæ recordátus est nóminis mei. Et pósuit os meum quasi gládium
acútum: in umbra manus suæ protéxit me, et pósuit me sicut sagíttam eléctam:
in pháretra sua abscóndit me. Et dixit mihi: Servus meus es tu, Israël, quia
in te gloriábor. Et nunc dicit Dóminus, formans me ex útero servum sibi: Ecce
dedi te in lucem géntium, ut sis salus mea usque ad extrémum terræ. Reges vidébunt,
et consúrgent príncipes, et adorábunt propter Dóminum, et sanctum Israël,
qui elégit te.
Graduale Jeremias i: 5, 9
Priúsquam te formárem in útero, novi te: et ántequam
exíres de ventre, sanctificávi te. V.
Misit Dóminus manum suam, et tétigit os meum, et dixit mihi:
Allelúja, allelúja. [Lk. i] Tu,
puer, prophéta Altíssimi vocáberis: præíbus ante Dóminum paráre vias ejus.
Allelúja.
Luc. i: 57-68
+ Sequéntia sancti Evangélii secúndum Lucam.
Elísabeth implétum est tempus pariéndi, et péperit fílium. Et audiérunt vicíni, et cognáti ejus, quia magnificávit Dóminus misericórdiam suam cum illa, et congratulabántur ei. Et factum est in die octávo, venérunt circumcídere púerum, et vocábant eum nómine partis sui Zacharíam. Et respóndens mater ejus dixit: Nequáquam, sed vocábitur Joánnes. Et dixérunt ad illam: Quia nemo est in cognatióne tua, qui vocétur hoc nómine. Innuébant autem patri ejus, quem vellet vocári eum. Et póstulans pugillárem, scripsit, dicens: Joánnes est nomen ejus. Et miráti sunt univérsi. Apértum est autem íllico os ejus, et lingua ejus, et loquebátur benedícens Deum. Et factus est timor super omnes vicínos eórum: et super ómnia montána Judǽæ divulgabántur ómnia verba hæc: et posuérunt omnes, qui audíerunt in corde suo, dicéntes: Quis, putas, puer iste erit? Etenim manus Dómini erat cum illo. Et Zacharías pater ejus replétus est Spíritu Sancto, et prophetávit, dicens: Benedíctus Dóminus Deus Israël, quia visitávit et fecit redemptiónem plebis suæ.
Credo.
Offertorium: Ps. cxi 13.
Justus ut palma florébit: sicut cedrus, quæ in Libano est, multiplicábitur.
Secreta:
Tua, Dómine, munéribus altária cumulámus: illíus nativitátem hónore débito celebrántes, qui Salvatórem mundi et cécinit adfutúrum, et adésse monstrávit, Dóminum nostrum Jesum Christum Fílium tuum: Qui tecum.
Communio: Luc. i: 76
Tu, puer, prophéta Altíssimi vocáberis: præíbus ante fáciem Dómini paráre vias ejus.
Postcommunio:
Sumat Ecclésia tua, Deus, beáti Joánnis Baptístæ generatióne lætítium: per quem suæ regeneratiónis cognóvit auctórem, Dóminum nostrum Jesum Christum Fílium tuum: Qui tecum.
Infra Octavam Missa dicitur ut in Festo; et pro Orationibus juxta diversitatem Temporum assignatis, dicitur 2° Oratio de sancta Maria Concéde, et 3° contra persecutores Ecclesiæ vel pro Papa.
